ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត ថាសម្ដេចគ្មានហេតុផលណាមួយក្នុងការរក្សានិក្ខេបទថ្នាក់បណ្ឌិតរបស់សម្ដេចជាការសម្ងាត់នោះទេ ដូច្នេះសម្ដេចបានដាក់ឱ្យសាធារណជនអាចទាញយកទៅពិនិត្យ និងសិក្សាបាន។ ការដាក់ឱ្យសាធារណជនទាញយកនិក្ខេបទពីអនឡាញនេះគឺឆ្លើយតបទៅនឹងលោក David Whitehouse ដែលបានសរសេថាលោកពិបាកក្នុងការស្នើសុំសាលាដើម្បីពិនិត្យលើនិក្ខេបទបណ្ឌិតរបស់សម្ដេចធិបតី ហ៊ុន ម៉ាណែត។

សម្ដេចធិបតីបានសរសេរកាលពីយប់ថ្ងៃទី៨ ខែវិច្ឆិកា ឆ្នាំ២០២៣ នៅលើបណ្ដាញសង្គមរបស់សម្ដេចថាបញ្ហាដែល David Whitehouse ជួបប្រទះដែលមិនអាចថតចម្លងនិក្ខេបទថ្នាក់បណ្ឌិតរបស់សម្ដេចបានគឺទាក់ទងនឹងគោលការណ៍របស់សាកលវិទ្យាល័យ Bristol មិនជាប់ពាក់ព័ន្ធនឹងសម្ដេចនោះទេ។

សម្ដេចថា៖ «តាមការចងចាំរបស់ខ្ញុំ គឺខ្ញុំមិនដែលបានស្នើសុំឱ្យសាកលវិទ្យាល័យ Bristol រក្សានិក្ខេបបទនេះជាការសម្ងាត់នោះឡើយ។ […] ខ្ញុំក៏គ្មានហេតុផលណាមួយ ក្នុងការរក្សានិក្ខេបបទរបស់ខ្ញុំជាការសម្ងាត់ដែរ»។

សម្ដេចធិបតីបានលើកឡើងបន្ថែមថា សម្ដេចក៏ដូចជាអ្នកសិក្សាដទៃផ្សេងទៀតតែងពេញចិត្តនូវការផ្តល់វាយតម្លៃ ផ្តល់មតិ ចំពោះសមិទ្ធផលការងារ ជាពិសេស ពីសំណាក់អ្នកដែលមានសមត្ថភាពជំនាញ រួមទាំងអ្នកសិក្សាអ្នកស្រាវជ្រាវដទៃទៀតផងដែរ។ សម្ដេចក៏ធ្លាប់បានផ្ដល់និក្ខេបទនេះទៅឱ្យមនុស្សមួយចំនួនរួចហើយ និងថាប្រសិនជាលោក David មកស្នើសុំសម្ដេចក៏ប្រាកដជាបានដូចគ្នា។

សម្រាប់អ្នកដែលចង់បាននិក្ខេបទថ្នាក់បណ្ឌិតរបស់សម្ដេចធិបតី ហ៊ុន ម៉ាណែត សូមចូលទៅ Link ខាងក្រោមនេះ៖ https://t.me/Dr_Hunmanetofcambodia/5633